« Rupture de stock » vu Medikamenter

« Rupture de stock » vu Medikamenter

Ëmmer erëm gi wichteg Medikamenter an den Apdikte knapp. Mir wollte vum zoustännege Minister wëssen, wei Lëtzebuerg mat der « rupture de stock » vu verschiddene Medikamenter ëmgeet a wei de Minister an Zukunft dozou bäidroe well, dass Patienten zu all Moment Zougrëff zu verschriwwene Medikamenter kennen hunn.

Dem Deputéierte Marc Goergen ass zu Ouere komm, datt verschidde Patiente keen Accès zu liewenswichtege Medikamenter, wei zum Beispill Antihypotenseuren hunn. Informatioune vu verschiddenen Apdikter no sinn eng ganz Rei Medikamenter an den Apdikte reegelméisseg « en rupture de stock ». Bei eise belschen a franséischen Noperen ass dëst mëttlerweil zu engem reelle Problem ginn. Dës « rupture de stock » bedeit fir eng ganz Rëtsch Patienten a Patientinnen eng Gefor fir hier Gesondheet, well si hirem Traitement net méi kënnen nokommen. Den Apdikte sinn an dësem Fall d’Hänn gebonnen a si kënnen de Patient Oder d’Patientin nëmmen un eng aner Apdikt verweisen.

An deem Zesummenhang wéilt ech de Ministeren dës Froe stellen:

  • Ass den Här Minister fir Gesondheet sech der akuter Problematik vun der « Rupture de Stock » bewosst ? Wa jo, wéini an ënner wéi enger Form gedenkt de Minister hei ze agéieren ?
  • Kann de Minister garantéieren, datt d’Patientinnen an d’Patienten zu all Moment Accès hunn zu hirem Medikament wat Si fir hiren Traitement brauchen ? Falls jo, wéi erkiàren sech déi aktuell Rupturen an den Apdikten?
  • Här Minister fir Gesondheet, wien ass responsabel fir d’Distributioun vun dëse wichtege Medikamenter ? Ass an dësem Kontext geplangt Verbesserungen un der Distributioun virzehuelen ? Wann jo, wéi eng Changementer wieren dat konkret ?
  • Plangt de Minister Schneider an dësem Kontext ze legiferéieren ? Wa jo, wat ass konkret virgesinn ?
  • Wat wëll d’Madamm Ministesch Lenert genee ënnerhuele fir dem Konsument, respektiv dem Patient, den Accès zu hire liewenswichtege Medikamenter ze vereinfachen an ze garantéieren ?

Mat déiwem Respekt,

GOERGEN Marc

Député

Wéi héich ass de staatlechen Afloss an de Verwaltungsréit vun der SNCA der SNCH an dem SNCT wierklech?

Wéi héich ass de staatlechen Afloss an de Verwaltungsréit vun der SNCA der SNCH an dem SNCT wierklech?

Well de Mobilitéitsminister eis net zefriddestellend ob eis parlamentaresch Fro iwwert de staatlechen Afloss an de Conseils d‘Administration vum SNCT, der SNCA an der SNCH geäntwert huet, froe mir nach emol no:

Den honorabelen Här Minister Bausch huet a senger Äntwert op meng parlamentaresch Fro N°427 zum engen net op all Froe geäntwert, ass zum aneren awer op guer net gestallte Froen (z.B. iwwert Dividenden) agaangen oder huet politesch Kommentarer formuléiert. Dëst féiert dozou, datt verschidde Froen nach eemol musse gestallt ginn, fir vum Minister eng Äntwert ze kréien, respektiv fir Prezisiounen zu den Äntwerten ze erhalen.

An deem Zesummenhang wéilt ech dem Minister dës Froe stellen:

  • Confirméiert de Minister, datt de Staat als bénéficiaire économique vun den 3 Gesellschaften, der SNCA, SNCT an SNCH, zeréckzebehalen ass?
  • Am Luxembourg Business Register, deen de fréieren Registre de Commerce et des Sociétés (ob deen de Minister a senger Äntwert awer nach verweist) ersat huet, fënnt een op enger Lëscht vun der Trésorerie de l’Etat, d’Nimm vun dräi Persounen, déi an den Opsiichtsréit vun deenen 3 Gesellschaften (SNCT, SNCA, SNCH) sinn. Si goufe vu staatlecher Säit genannt a si laut der Äntwert vum Minister Fonctionnairen.
  • Kann de Minister confirméieren, datt dës 3 Beamten eng Autorisatioun fir eng Niewebeschäftegung als Administrateur an der SNCT vun hirem zoustännege Minister kruten? Wa jo wéini goufen dës Autorisatiounen ausgestallt?
  • Vue datt d’Zuele bei der SNCA laut Ausso vum Minister net méi vergläichbar mat aneren Exercicer sinn: Wéi héich waren d’Indemnitéite vun den Administrateuren – opgeschlësselt no Gesellschaft a mat enger Indikatioun zur Unzuel vu Sëtzunge vum Conseil pro Joer vun 2012 bis haut?
  • Ass de Minister net der Meenung, datt iwwert den Ëmwee vun enger Nominatioun vu Beamten an den Conseil vun enger SA duerch eng SARL – amplaz duerch de Staat, deen bénéficiaire économique ass – de Geescht vum Gesetz vum 25. Juli 1990 ëmgaange gëtt?
  • Ass de Minister net der Meenung, datt een eng Ännerung vum Gesetz vum 25. Juli 1990 misst ustriewen, fir déi do festgehalen Dispositiounen op all Gesellschaftsformen auszedehnen?

Mat déiwem Respekt,
CLEMENT Sven
Député

Lobbyregësteren zu Lëtzebuerg

Lobbyregësteren zu Lëtzebuerg

Mir wollte vum Premierminister wëssen, ob d’Regierung Wëlles huet en Lobbyregister ze Lëtzebuerg fir d’Exekutiv anzeféieren.

Am Folgende fannt der den Text zu eiser Fro:

D’Kreatioun vu Lobbyregësteren ass e vill diskutéiert Thema an der EU. Warend Irland schonn zanter 2015 e Lobbyregëster huet, gëtt aktuell an Daitschland souwuel um Niveau vum Bundestag wéi och vun de Landtagen iwwert d’Aféiere vun engem Lobbyregëster fir méi Transparenz debattéiert. Eng Majoritéit vun Deputéierten aus dem Europaparlament huet sech rezent fir méi staark Transparenzregelen am Kontakt mat Lobbyisten op EU-Niveau ausgeschwat.

An deem Zesummenhang wéilt ech dem Minister dës Froe stellen:

  • Huet d’Regierung virum Hannergrond vun enger Transparenzsteigerung vir, nach an dëser Legislaturperiod e Lobbyregëster anzeféieren? Falls jo, wéi géif dëse Projet konkret ausgesinn a bis wéini géif e realiséiert ginn?
  • Hâr Minister, wat schwâtzt géint e Lobbyregëster fir d’Exekutiv?
  • Ass d’Regierung gewollt een ëffentlech zougânglechen Agenda ze publizéieren, an deem d’Treffen tëscht Regierungsmemberen an externen Acteure festgehale ginn?

Mat déiwem Respekt,

CLEMENT Sven

Député

Manner Risiko bei der Existenzgrënnung?

Manner Risiko bei der Existenzgrënnung?

Mir wollte vun den zoustännege Minister wëssen, wéi eng administrativ Hürden aktuell bei enger Firmegrënnung bestinn a wéi d’Regierung gedenkt an Zukunft Existenzgrënner ze ënnerstëtzen. D’Chancë vun der Digitaliséierung an d’Aféiere vun engem Congé sans solde fir Firmegrënner wären an dësem Kontext Mesuren, déi d’administrativ Demarchë vereinfachen an den individuelle finanzielle Risiko senke kéinten.

Am Folgenden fannt dir de ganzen Text vun eiser parlamentarescher Fro

Am Koalitiounsaccord an och am neie Budgetsprojet betount de Wirtschaftsministère ëmmer erëm, datt en eng Prioritéit doran geséit aus Lëtzebuerg eng “Start-up Nation” ze maachen. Virun allem nei an innovativ Entreprisë sollen dozou bruecht ginn, Lëtzebuerg als hire Standuert ze wielen. Grad vun innovative Produiten an Déngschtleeschtunge geet awer en héije Risiko aus, well net all Innovatioun vun de Konsumenten och ugeholl gëtt, nëmme well se nei ass. An dësem Kontext ass et dofir ganz wichteg, Entrepreneuren eng gewësse Sécherheet bei der Existenzgrënnung ze garantéieren an doriwwer eraus mussen d’Demarchen, déi néideg sinn, fir eng Entreprise ze grënnen, iwwersichtlech a séier ofgewéckelt kenne ginn, fir dass déi Betraffen de Courage net schonns verléisst, éier si hiert Geschäft iwwerhaapt opgemaach hunn. D’Vereinfachung vun de Prozedure bei der Existenzgrënnung an eng Dämpfung vum individuelle Risiko géingen dobäi net nëmmen neie Start-ups mat innovative Produiten zegutt kommen, mee allgemeng nei Entreprisen ënnerstëtzen. Et däerf ee schliisslech net vergiessen, dass och Persounen, déi sech mat traditionelle Produiten an Déngschtleeschtunge selbststänneg maache wëllen, wéi bspw. am Beräich vum Handwierk, e wichtegt Element vun der lëtzebuergescher Wirtschaft duerstellen. An deem Zesummenhang wéilt ech de Ministeren dës Froe stellen:

  • D’Europäesch Unioun encouragéiert seng Memberlänner dozou, d’administrativ Demarchen, déi fir eng Existenzgrënnung néideg sinn, esou ze gestalten, dass et méiglech ass, innerhalb vun 3 Deeg eng Entreprise ze grënnen.
  • Gett des Frist zu Lëtzebuerg agehalen? Wéi vill Deeg dauert et zu Lëtzebuerg an der Moyenne bis all d’Demarchen (z. B. den Depot beim RCSL, d’Homologatioun vum Diplom, d’autorisation d’établissement an d’Umeldung bei der CCSS/TVA) ofgewéckelt sinn?
  • Ass et méiglech des administrativ Demarchen alleguerten online ze maachen?
  • Wéi vill muss een insgesamt fir d’Demarchen, déi am Zesummenhang mat der Existenzgrënnung stinn, bezuelen?
  • De Christian Müller huet am Tageblatt vum 07.03.2019 d’Iddi opgeworf nom schwedesche Virbild e Congé sans solde vu sechs Méint fir zukünfteg Existenzgrënner anzeféieren. Wäert d’Regierung esou e Congé aféieren, fir den individuelle finanzielle Risiko, dee mat enger Firmëgrënnung verbonnen ass, ze dämpfen, fir esou en zousätzlechen Ureiz zur Selbststännegkeet ze schafen?

Mat déiwem Respekt,

CLEMENT Sven

Député

Äntfert op eis Fro: Aschreiwungen bei der ADEM

Äntfert op eis Fro: Aschreiwungen bei der ADEM

Et dauert am Schnëtt 26 Deeg bis ee bei der ADEM definitiv ageschriwwen ass. An der Stad waart ee mat 28. Deeg am längsten. Dat ass eng vun den Äntwerten, déi mer vun der Regierung op eis parlamentaresch Fro vum 28. Januar 2018 kruten.

Domadder krute mer vun offizieller Säit bestätegt, dass d’Aschreiwunge bei der ADEM effektiv extrem lues sinn.

Als Erklärung krute mer gesot, dass 50% méi Läit sech tëscht November a Januar bei der ADEM ageschriwwen hunn, anscheinend wéinst der Ännerung vum Gesetz zum REVIS an eisem attraktive lëtzebuergeschen Aarbechtsmarché fir Mënschen, déi am Ausland wunnen.

De Problem ass also zur Halschent selwer gemaacht, well d’ADEM sech net genuch op d’Héicht vun der Aarbecht virbereet huet. D’Bezuelen däerf de Bierger mat senger Zäit, säin Dossier muss waarden.

D’Pirate géifen sech wënschen, dass d’Regierung op Wierder vum Premierminister vu senger Ried vum 11ten Dezember 2018 Dote folge léisst. Well d’ADEM ass, am Géigendeel zu dem wat den Här Premierminister sot, nach laang keng berodend Funktioun fir vill Bierger, mee eng onnéideg administrativ Demarche ouni vill Méiwäert.

Mer fuerdere konkret Mesurë fir de Fonctionnement vun der ADEM ze verbesseren. Eng Digitaliséierung an eng schnell Méiglechkeet sech anzeschreiwe géifen den Aarbechtsichenden zu Lëtzebuerg scho vill onnéideg Demarchen erspueren.

Hei d’Fro

https://www.piraten.lu/waarden-op-daschreiwung-bei-der-adem-wei-eng-meiglechkeeten-hunn-dlaeit-dei-de-revis-brauchen/

Hack op education.lu

Hack op education.lu

Mir goufe gewuer, dass et op der Plattform education.lu een Erpressungsversuch u Schüler a Proffe gouf. Mir hunn der Regierung dofir eng Fro gestallt, fir méi Informatiounen zu deem Tëschefall ze kréien.

Am Folgende fannt der den Text zu eiser Fro.

Wéi d’Zeitung vum Lëtzebuerger Vollek de 5te Mäerz beriicht, gouf et op der Plattform vum Bildungsministère ee gréisseren Dateklau vu Passwierder, mat dem sech Hacker Accès op d’Konte vu Benotzer verschaaft hunn. Op Nofro bei engem Bedeelegten ass eis dës Informatioun confirméiert ginn. No deenen eis virleienden Informatiounen, hunn d’Benotzer vun education.lu an hirer Boîte een engleschsproochege Mail scheinbar vun hinne selwer geschéckt gouf. An dësem Mail gëtt de Benotzer gefuerdert eng Zomm Sue via Bitcoin un een Erpresser ze iwwerweisen. Mat engem einfache Passwuertwiessel kéint een den Hacker ganz einfach erëm vu sengem Konto ausschléissen. Leider ass et sou, dass d’Benotzer aktuell net iwwert d’Rechter besëtzen, fir hiert eegent Passwuert ze änneren. Soumat sinn zurzäit Schüler an Enseignanten engem Erpressungsversuch ausgesat an hunn aktuell keng Kontroll iwwert hiert Konto.

An deem Zesummenhang wéilt ech de Ministeren dës Froe stellen:

  • Huet d’Regierung Kenntnis vun dësem Hackerugrëff an Erpressungsversuch op education.lu? Falls jo, wéi vill Konte sinn hei insgesamt betraff?
  • Gouf déi informatesch Faille op education.lu geléist? Falls jo, wéi gouf se geléist? Falls nee, wéi vill Zäit schätzt d’Regierung, dass et brauch fir d’Faille ze léisen? Wat waren d’Ursaache vun der Faille?
  • Wéi eng Mesurë goufen ënnerholl fir de Schüler an Enseignanten ze hëllefen?
  • Wéi eng Mesurë wäert d’Regierung an Zukunft ënnerhuelen, fir Schüler virun Hackerattacken an Erpressungsbréiwer op ëffentleche Plattformen ze schützen?

Mat déiwem Respekt,

GOERGEN Marc

Député

Eng méi schnell konsularesch Hëllef bei engem Problem am Ausland?

Eng méi schnell konsularesch Hëllef bei engem Problem am Ausland?

Eng Aschreiwung am registre central d’enregistrement de personnes physiques voyageant ou résidant à l’étranger soll hëllefen am Noutfall am Ausland méi séier konsularesch Hëllef ze erhalen. Leider ass de Register zu Lëtzebuerg awer nach net wierklech bekannt. Mir hunn beim responsabele Minister nogefrot, wéi vill Léit bis elo vun der Offer gebrauch gemaach hunn, a wéi an Zukunft besser ob dës Méiglechkeet opmierksam gemaach wäert ginn.

Am Folgende fannt dir den Text zu eiser Fro:

Am Aktivitéitsrapport vun 2018 beschreift den Ausseministère de registre central d’enregistrement de personnes physiques voyageant ou résidant à l’étranger, deen et Lëtzebuerger erlaabt, sech beim Ausseministère ze registréieren, wann se sech temporär an d’Ausland beginn oder awer och ganz do liewen. D’Registréierung soll dozou bäidroen, dass ageschriwwe Persounen, falls se am Ausland an eng Noutsituatioun komme sollten, méi schnell konsularesch Hëllef kréie kennen. Leider ass den aktuelle Succès vum Register awer éischter mitigéiert, well déi nei Offer nach net bekannt genuch ass, obwuel et schonn eng Réi Promotiounsmesurë gouf, déi och am Rapport genannt ginn. An deem Zesummenhang wéilt ech dem Minister dës Froe stellen:

  • Wéi vill Persounen hunn bis elo vun der Offer vum Ministère gebrauch gemaach an sech am registre central d’enregistrement de personnes physiques voyageant ou résidant à l’étranger ageschriwwen?
  • Firwat gouf entscheet, dass just bei neie Passufroe Werbung fir dëse Register gemaach soll ginn? Bei wéi vill Ufroe fir en neie Pass gouf ob dësem Wee Reklamm gemaach an e Flyer fir den neie Register bäigeluecht?
  • Wéi vill Passverlängerunge goufen an der selwechter Zäit gemaach?
  • Gëtt et en Aktiounsplang fir de Register méi bekannt ze maachen, fir Lëtzebuerger am Noutfall am Ausland nach besser hëllefen ze kënnen?

Mat déiwem Respekt,

CLEMENT Sven

Député

Problemer bei der Vermëttlung vun Déiren, déi eng Amputatioun erlidden hunn

Problemer bei der Vermëttlung vun Déiren, déi eng Amputatioun erlidden hunn

Feelt engem Hond oder enger Katz e Stéck vum Schwanz, ass et Déiereschutzorganisatiounen opgrond vun der aktueller Gesetzeslag oft net méiglech dës Déieren an eng Famill ze vermëttelen. Mir wollten vun der Regierung wëssen, ob een d’Aarbecht vun Déiereschutzorganisatiounen an dësem Beräich net besser ënnerstëtzen kéint.

Am Folgenden fannt dir den Text zu eiser Fro:

Den Artikel 11 vum lëtzebuergeschen Déiereschutzgesetz hält zesumme mam Reglement grand-ducal vum 6 November 2018 fest, dass et verbueden ass en Hond ze besetzen oder ze verkafen, deen eng Amputatioun erlidden huet, déi veterinärmedezinesch net noutwenneg war an net ob eng Kastratioun oder eng Sterilisatioun zeréckgeet. Esou ass et zu Lëtzebuerg säit 2018 also net méi erlaabt en Hond ze besetzen, deem opgrond vu vermeintleche Schéinheetsidealer de Schwanz amputéiert gouf. Obwuel dëst Gesetz eng wichteg Mesure ass, fir d’Verstümmelung vu Rassenhënn ze ënnerbannen, setzt et Associatiounen, wéi z.B. Pets Angels Luxembourg, déi sech em vernoléissegt Déieren am Ausland an zu Lëtzebuerg këmmeren, virun e grousse Problem. Duerch dat néit Gesetz ass et Déiereschutzorganisatiounen oft nämlech net méi méiglech, amputéierten Déieren en neit Doheem ze schenken, well d’Associatiounen a ville Fäll net noweise kennen, wéi et zu der Amputatioun koum – bspw. duerch en Accident, eng ugebuere Malformatioun oder eben e mënschlecht Agräifen – , an d’Déieren dofir net weider vermëttelen däerfen.

An deem Zesummenhang wéilt ech dem Minister dës Froe stellen:

  • Wéi a wéi oft gëtt d’Ëmsetzung vum Artikel 11 vum Déiereschutzgesetz zu Lëtzebuerg kontrolléiert?
  • Wéi a wéi oft gëtt spezifesch kontrolléiert, dass Léit keng amputéiert Hënn halen?
  • Ass d’Regierung der Meenung, dass d’Déiereschutzgesetz an de Reglement vum 6 November 2018 ënnert hirer aktueller Form Déiereschutzorganisatiounen an hirer Aarbecht aschränken?
  • Gedenkt d’Regierung – villäicht iwwert de Wee vu staatlech ausgestallten a kontrolléierte Lizenzen – bestëmmten Associatiounen, déi sech fir d’Wuel vu vernoléissegten Déiren asetzen, eng Erlaabnis ze erdeelen, fir amputéiert Hënn oder Katzen aus dem Ausland an dem Inland zu Lëtzebuerg vermëttelen ze kennen?

Mat déiwem Respekt,

CLEMENT Sven

Député

Medezinesche Cannabis zu Lëtzebuerg

Medezinesche Cannabis zu Lëtzebuerg

Mat der kommender Legaliséierung vum Cannabis soll vun der Produktioun bis zum Verkaf alles iwwert de Staat gereegelt ginn. Dëst ass aktuell beim medezinesche Cannabis awer laang nach net de Fall, an dofir wëlle mer vun der Regierung wëssen, wéi hir Strategie hei ausgesäit an op hei scho konkret Schrëtt ënnerholl gi sinn.

Am Folgende fannt der den Text zu eiser Fro.

Duerch d’Gesetz vum 20. Juli 2018 ass den Asaz vum medezinesche Cannabis no joerzéngtelaangen Diskussiounen endlech eng Realitéit ginn. Fir Mënsche mat chronescher Péng stellt d’Anhuele vu cannabishaltëge Produkter eng raisonnabel Alternativen zu anere Medikamenter duer. De medezinesche Cannabis, deen zu Lëtzebuerg verkaf gëtt, gëtt aktuell aus anere Länner importéiert. Vun engem ekologeschen a logistesche Standpunkt aus gesi, stellt sech awer d’Fro, ob den Import aus europäeschen Noperlänner keng sënnvoll Alternativ wär.

An deem Zesummenhang wéilt ech de Ministeren dës Froe stellen:

  • Opgelëscht no den Hierkonftslänner, wéi eng Quantitéit u medezineschem Cannabis ass säit der Promulgatioun vum Gesetz vum 20. Juli 2018 op Lëtzebuerg importéiert ginn?
  • Gouf et vum lëtzebuergeschen Gesondheetsministère eng ëffentlech Ausschreiwung fir eng Commande vu medezineschem Cannabis? Falls jo, wéi eng Kritäre sinn heibäi consideréiert ginn? Falls nee, ass beim Kaf vum medezinesche Cannabis am Ausland de Präis iwwert ëffentlech Verhandlungen zustane komm? Wéi eng Offere louchen dem Gesondheetsministère an dem Fall vir, wat waren d’Präisser an d’Konditioune vun dësen Offeren a firwat huet de Minister sech fir déi gewielten Offer entscheet?
  • Huet d’Regierung scho Schrëtt ënnerholl, fir bilateral Accorde mat europäeschen Nopeschlänner zum Handel vu medezinesche Cannabis ze fannen? Falls jo, wéi eng Gespréicher sinn zu dem Thema ofgehale ginn a wat fir eng Fortschrëtt si festgehale ginn? Falls nee, gedenkt d’Regierung, och ugesiichts vun der Legaliséierung vum Cannabis zum rekreative Gebrauch, dës Gespréicher mat europäeschen Autoritéiten ze sichen?
  • Si virum Hannergrond, dass d’Produktioun an de Verkaf vum rekreative Cannabis zu Lëtzebuerg der Kontroll vum Staat sollen ënnerleien (Säit 105 am Koalitiounsvertrag), scho konkret Schrëtt ënnerholl ginn fir déi staatlech Kontroll och am Beräich vum medezinesche Cannabis ëmzesetzen?
  • Gesäit d’Regierung, och en vue vun der zukünfteger Legaliséierung vum Cannabis zum rekreative Gebrauch, d’Aféiere vun enger staatlecher Agence fir de Cannabis vir? Falls jo, wéini soll dës opgemaacht ginn?

Mat déiwem Respekt,

GOERGEN Marc
Député